ඔව්, ඔබ සමඟ අප මේ සජීවීව සම්බන්ධ වන්නේ “ජාතික නිරුවත් වෙරළ තීරය” විවෘත්ත කිරීමේ ජාතික මහෝත්සවය සමඟයි. ඔබට මගේ දකුණු අත පැත්තෙන් ඈතින් පෙනෙන්නේ කළුතර දාගැබ් වහන්සේ.

එවන් පුණ්‍ය භූමියක මෙවන් නිරුවත් වෙරළ තීරයක් ඇති කිරීම ගැන අපේ ජාතියේ පිනෙන් උපන් අපේ අති ගරු බී..ඉ..ඉ..ඉ..ප් තුමාට සහ එතුමාගේ උගත් බුද්ධිමත් උපදේශක මහත්වරුන්ට මුළු මහත් ජාතියේම ගෞරවය මේ මොහොතේ හිමි වියයුතු බවයි මගේ නම් හැගීම.

හොඳයි, මේ මොහොතේ අපත් සමඟ එක්වෙනවා ජාතියේ ශ්‍රේෂ්ට කලාකරු, මහා සංචාරක ඇක්සොන් ජොක්සන් මහතා.

ඇක්සොන් ජොක්සන් මහත්තයා, මොකද හිතන්නේ අද මේ වෙන්න යන මහා වෙනස ගැන?

ආයූබෝවේවා ලහිරු.
මේක මේ බොහොම ඉදිරිගාමී වැඩක්නේ ලහිරු.

ඇයි ඔබතුමා එහෙම කියන්නේ?

ලහිරු, මම අපේ අති ගරු බී..ඉ..ඉ..ඉ..ප් තුමා හඳුන්වන්නේ ජනමූල නායකයා කියලානේ? ජන මූල?
හොඳයි ඔබ මට කියන්න මොකක්ද්ද ජනයාගේ මූලය? මොකක්ද්ද අපි හැමෝගෙම මූලය?
අපි හැමෝගෙම මූලය තමයි අපේ උත්පත්තිය, එහෙමත් නැතිනම් මෙළොවට බිහිවීම.
අපි හැමෝම මේ ලෝකෙට බිහිවෙන්නේ අමු නිරුවතින් ලහිරු, සරල සිංහලෙන් කියනවනම් අමු හෙළුවෙන්. ඒකනේ ලහිරු ස්බාවධර්මය.
ඊට පස්සේ මේ ලෝකේ, මේ සමාජය තමයි මේ ඇදුම් කියලා බාහිර දෙයක් අපි මත පටවන්නේ.
දැන් බලන්න මම “වලන්හතේ” කියන වාර්තා වැඩ සටහන එක්ක යනවා අප්‍රිකාවේ ගෝත්‍ර නිරීක්ෂණයට.
එතනදී මට හමු වෙනවා මගේ මුතුන් මිත්තා, ඒ තමයි මුල්ම මානවයා. ඔවුන් ඉන්නේ අමු නිරුවතින්නේ ලහිරු. ඔවුන්නේ ලහිරු පසු කාලීනව මුළු ලෝකේ පුරාම පැතිරිලා යන්නේ. ඔවුන්ගෙන්නේ ලහිරු අපි හැමෝම පැවතගෙන එන්නේ.

එතකොට ඔබතුමාගේ අර්ථකතනය අනුව මේ සිද්ධ වෙන්නේ අපි නැවතත් ස්වාභාවධර්මය කරා ලං වීමක්? එහෙමත් නැතිනම් අපේ මුල් සොයා යාමක්?

හරියට හරි ලහිරු, හරියට හරි. අන්න ඔබ අල්ල ගන්නවා නියම තැනින්.
ඒක නෙමේයිද ලහිරු ඇත්ත? ඒක නෙමේද ඇත්ත?
අද ලංකාවට වෙලා තියෙන ප්‍රශ්නෙත් ඕකනේ ලහිරු, මුල මතක නැතිවීම. අපි මුල අමතක කරන්න හොඳ නෑ ලහිරු.

හොඳයි. බොහොම ස්තූතියි ඇක්සොන් ජොක්සන් කලාකරුවානෙනි.

ආවඩා ආයුබෝවේවා ලහිරු

හොඳයි, මීළගට අපත් සමඟ එකතුවන්නේ ගරුතර රතුලීයේ අතන මෙතන ස්වාමීන්වහන්සේ.
අවසර අපේ හාමුදුරුවනේ, ඔබ වහන්සේගේ අදහස මොකක්ද මේ “ජාතික නිරුවත් වෙරළ තීරය” ගැන.

ලහිරු, අපේ සංස්කෘතිය පෝෂණය වෙන්නේ බුදු දහම එක්ක බැදුනු ජීවන රටාව නිසා. බුදු දහමේ එන ශ්‍රේෂ්ට සංකල්ප තමයි අල්පේච්චතාවය සහ අත් හැරීම. දැන් බලන්න ලහිරු මෙතනත්,”ජාතික නිරුවත් වෙරළ තීරය” මඟිනුත් සිද්ධ වෙන්නේ ඒකම නෙමේයිද කියලා.
අත් හැරීම, සියලු බැදීම් අත් හැරීම.
ඔබ ශුන්‍යත්වය ගැන අහලා ඇතිනේ, බලන්න මීටත් වඩා මොන ශුන්‍යත්වයක්ද ලහිරු. මෙයින් වෙන්නේ විදේශිකයන් පවා බුදු දහමේ මූලික සංකල්ප කෙරෙහි නැඹුරුවීමක්. ඒකයි මේ වැඩේ අගය කළ යුතුවන්නේ.
ඒ වගේම, මේ “ජාතික නිරුවත් වෙරළ තීරය”තුළ සියල්ලන්ම එකහා සමානයි. ඒතුළින් ඉස්මතු වෙන්නේ සමානාත්මතාවය පිළිබඳ මූලික සංකල්ප.
අපිනම් අතිගරු බී..ඉ..ඉ..ඉ..ප් තුමාට යෝජනා කරන්නේ මේ “ජාතික නිරුවත් වෙරළ තීරය” තුල කබානා ආකාරයට භාවනා කුටි තනා බවුන් වඩන්නත් ඉඩ ප්‍රස්ථාව ලබාදෙන්න කියලා.
ඒ වගේම ලහිරු, කළුතර බෝධීන් වහන්සේ මේ “ජාතික නිරුවත් වෙරළ තීරය” අසබඩම පිහිටලා තියෙන නිසා භාවනා ආරම්භ කරන්නට මත්තෙන් පුළුවන් බෝධීන් වහන්සේ වැදපුදාගෙන පංච ශීලයේම පිහිටලා නිරුවත් වෙන්න.

බොහොම ස්තූතියි අතිගරු රතු ලියේ අතන මෙතන ස්වාමින්වහන්ස.

ඔව් මීළඟට අපත් සමඟ එකතු වෙනවා දිව රෑ නොතකා අධිරාජ්‍යවාධින්ගෙන් සයිබර් අවකාශය බේරා ගැනීම සඳහා නොපැකිළී, නොනැවතී අනවරතව කැපවී සිටින ජාති(ක)වාදී™ දේශහිතෛශී™ දේශමාමක™ සයිබර් විරුවෙක්;
වීර පුරන්අප්පුලගේ අල්ලපු ගෙදර පුංචි ගමරාල ගුණවර්ධන.

සුබ උදෑසනක් පුරන්අප්පු
තෙරුවන් සරණයි ලහිරු

හොඳයි, ඔබ තරුණයෙක් විදිහට සහ නිරන්තරයෙන් අන්තර්ජාලය සමඟ ගණුදෙනු කරන්නෙක් විදිහට ඔබ දන්නවා වත්මන් රජයට විරුද්ධව අන්තර්ජාලයේ විවිධවූ වැරදි, වෛරී සහගත™ අසත්‍ය ප්‍රචාර පැතිරෙනවා; ඒ වගේම අපි දන්නවා ඔබ ශ්‍රේෂ්ට සයිබර් විරුවෙක් ලෙස අන්තර්ජාල වෙබ් අඩවි තුළින් ගෙනයන මේ දුෂ්ට™ ක්‍රියාවන්ට එරෙහිව නැඟී සිටිනවා.
ඔබෙන් මම අහන්නේ මේ ප්‍රශ්නය, අදින් මේ ඇරඹෙන “ජාතික නිරුවත් වෙරළ තීරය” ගැන අන්තර්ජාලයේ පැතිරෙන්නේ කෙබදු ආරංචිද?

තෙරුවන් සරණයි ලහිරු,
පහුගිය දවස් ටිකේ අන්තර්ජාලයේ සිට තම අශුචි ගඳ™ පැතරවූ අවජාතකයන්™ බොහොම දෙනෙක් පහුගිය දොහේ සෙත්තපෝන්චි™ වී යාමටත් කුජීත™ වීමටත් පටන්ගත්තා ලහිරු. මේක තමයි අපේ බී..ඉ..ඉ..ඉ..ප් තුමාගේ පින්™ බලය. උන්නාන්සෙට විරුද්ධව කටයුතු කරන සියළු අවජාතික™, ආර්ථික ඝාතක™, ඇන්.ජී. ඕ ඩොලර් වලට කහින ඩොලර් කාක්කන්ට™ බෑ ලහිරු අපේ මේ පුණ්‍ය භූමිය™ වනසන්න. පහුගිය මැතිවරණ ප්‍රථිඵලයෙන් වුණත් ඔය විපක්ශයේ බත් බැලයන්ට™ ජනතාවගෙන් ඉලපත් පහර™ හම්බුනානේ ලහිරු.
අපි දිනලා ඉවරයි..!
අපි දිනලා ඉවරයි..!
අපි දිනලා ඉවරයි..!
ලහිරු, දැන් අපිව පරද්දන්න මෙලෝ යකෙක්ට බෑ.

බොහොම ස්තූතියි පුරන්අප්පු සයිබර් විරුවාණෙනි.
තෙරුවන් සරණයි ලහිරු.

හොඳයි අපි ප්‍රවෘත්ති විකාශය සඳහා ප්‍රධාන පාළක මැඳිරිය කරා යොමුවෙනවා නැවතත් ඔබහා එකතු වීමේ බලාපොරොත්තුවෙන්.

ඔබ මේ රැදී සිටින්නේ කළුතර බෝ සමිඳු අභියස සිට ගෙන එන “ජාතික නිරුවත් වෙරළ තීරය” විවෘත්ත කිරීමේ ජාතික මහෝත්සවවයේ සජීවී විකාශය සමඟයි.
රැදී සිටින්න අප සමඟ.

—————————–
(තිරය පිටුපස)

මචන් පුරන්, උඹලා අර බ්ලොග් දෙකට මොකෝ කළේ?

ලහිරුවා, අපි ඒ දෙකටම චීනෙක් ලව්වා නියම වැඩක් දුන්නා මචන්. චීනා වැඩි ගාණක් ගත්තෙත් නැහැ. ආයේ තිතටම වැඩේ දුන්නා.
එකක්නම් කෙළින්ම ඩිලීට් කරලා දැම්මා. ඊට පස්සේ පොරව චාටර් කරලත් දැම්මා ආයේ ලියන්න බැරි වෙන්නම. අනිකනම් දැන් කන්ට්‍රෝල් කරන්නේ අපේ එකෙක්. ඌ ඒකත් එක්ක සෙල්ලම් කරනවා, ඉදලා හිටලා වාක්‍යක් දෙකක් දාලා. හා හා. නියම ආතල් වැඩේ.

එළ එළ, එතකොට අර එක බ්ලොග් එකක් ලියපු එකෙක් ලෙක්චරර් කෙනෙක්ද කොහෙද කිව්වා නේද? උඹලට බැරිවුනාද පොරව හොයාගන්න?

අනේ මන්දා බන්, ඌ බොරුද කොහෙද දාලා තිබිලා තියෙන්නේ. අපි තව පොඩ්ඩෙන් අහකයන එවුන් දෙන්නෙක්ගේ අතපය කඩනවා. නුලෙන් උන් දෙන්නා බේරුනේ.

හරි මචන්, මම යනවා ප්‍රොගෑම් එකට. ආයේ පස්සේ වෙලාවක සෙට් වෙමු.

තෙරුවන් සරණයි ලහිරු.